വിശപ്പില്ലാത്ത ലോകത്തിനായി...

ഒക്‌ടോബര്‍ 16- ലോക ഭക്ഷ്യ ദിനം ഒക്‌ടോബര്‍ 17- അന്താരാഷ്‌ട്ര പട്ടിണി നിവാരണ ദിനം

കൂട്ടുകാര്‍ക്കറിയാമോ ലോകത്ത്‌ എത്രപേര്‍ പട്ടിണി കിടക്കുന്നുണ്ടെന്ന്‌. നൂറുകോടിയിലേറെ ആളുകള്‍ ഭക്ഷണമില്ലാതെ വലയുന്നുണ്ടെന്നാണ്‌ കണക്ക്‌. മനുഷ്യചരിത്രത്തില്‍ ആദ്യമായാണ്‌ ഇത്രയും ജനങ്ങള്‍ പട്ടിണിക്കാരാ കുന്നത്‌. 2008ലെ കണക്കുകള്‍ പ്രകാരം ലോകത്ത്‌ 6,706,993,152 ജനങ്ങളുണ്ട്‌. അതായത്‌ ഓരോ ആറു പേരിലും ഒരാള്‍ പട്ടിണിക്കാരനാണ്‌.

വിശപ്പ്‌ വാഴുന്നിടത്ത്‌ സമാധാനം നിലനില്‍ക്കുകയില്ല. വിശക്കുന്നവനു മുമ്പില്‍ യുക്തിയും മതവും പ്രാര്‍ഥനയും ഒട്ടും വിലപ്പോകുകയുമില്ല എന്ന്‌ പ്രശസ്‌ത റോമന്‍ ചിന്തകന്‍ സെനേക്ക പറഞ്ഞിട്ടുണ്ട്‌. മനുഷ്യന്‌ വെള്ളവും വായുവും പോലെതന്നെ പ്രാഥമികാവശ്യങ്ങളിലൊന്നാണ്‌ ഭക്ഷണവും.

ഭക്ഷണ സാധനങ്ങളുടെ വിലക്കയറ്റവും അവയുടെ ദൗര്‍ലഭ്യവുമാണ്‌ ദാരിദ്ര്യത്തിനും പട്ടിണിക്കും കാരണങ്ങളായി ചൂണ്ടിക്കാണിക്കപ്പെടുന്നത്‌. പട്ടിണി നിര്‍മാര്‍ജനവും ഭക്ഷ്യ സുരക്ഷയും തന്നെയാണ്‌ മറ്റെന്ത്‌ വികസന ലക്ഷ്യ ങ്ങളെക്കാളും എല്ലാക്കാലത്തെയും മനുഷ്യന്റെ സ്വപ്‌നം. ഭക്ഷ്യ സുരക്ഷയ്‌ക്കും കാര്‍ഷിക വിളകളുടെ സംരക്ഷണത്തിനുമായി ദശകോടികളാണ്‌ ഓരോവര്‍ഷവും ചെലവഴിക്കുന്നത്‌. ഇവ ഉദ്ദേശിച്ച രീതിയില്‍ ഫലം കാണുന്നില്ലെന്നതിന്റെ തെളിവാണ്‌ ലോകത്ത്‌ ഇപ്പോഴും നടക്കുന്ന പട്ടിണി മരണങ്ങള്‍. സമീപ വര്‍ഷങ്ങളില്‍ ഒറീസ, ആന്ധ്രാപ്രദേശ്‌, കര്‍ണാടക, ബീഹാര്‍ തുടങ്ങിയ സംസ്ഥാനങ്ങളില്‍ പട്ടിണി മരണങ്ങള്‍ നിരവധിയുണ്ടായിട്ടുണ്ട്‌. ഈ വര്‍ഷമാകട്ടെ രാജ്യം കടുത്ത വരള്‍ച്ചയിലൂടെയും വെള്ളപൊക്കത്തിലൂടെയും കടന്നു പോയ്‌കൊണ്ടിരിക്കുകയുമാണ്‌.
ഒരു നേരത്തെ ആഹാരത്തിനുവേണ്ടി വിശക്കുന്ന കോടിക്കണക്കിനാളുകളിലേക്ക്‌ ലോകമനഃസാക്ഷിയുടെ ശ്രദ്ധ ക്ഷണിക്കുക എന്നതാണ്‌ ഭക്ഷ്യദിനാചരണം കൊണ്ട്‌ അര്‍ഥമാ ക്കുന്നത്‌.

എഫ്‌എഒ

യുഎന്‍ ഭ ക്ഷ്യ -കൃഷി സംഘടന ഫുഡ്‌ ആ ന്‍ഡ്‌ അ ഗ്രിക്കള്‍ച്ച റല്‍ ഓര്‍ഗനൈ സേഷന്‍ (എഫ്‌എഒ) സ്ഥാപിതമായത്‌ 1945 ഒക്‌ ടോബര്‍ 16 നാണ്‌. ഇതിന്റെ ഓര്‍മയാക്കായിട്ടാണ്‌ എല്ലാ വര്‍ഷവും ഒക്‌ടോബര്‍ 16 ലോക ഭക്ഷ്യദിനമായി ആചരിക്കുന്നത്‌. 1979 മുതലാണ്‌ ഈ ആചരണം തുടങ്ങിയത്‌. ആ വര്‍ഷം നവംബറില്‍ ചേര്‍ന്ന എഫ്‌എഒയുടെ ഇരു പതാമത്തെ ജനറല്‍ കോണ്‍ഫറന്‍സില്‍വച്ചാണ്‌ ഒക്‌ടോബര്‍ 16 അന്താരാഷ്‌ട്ര ഭക്ഷ്യദിനമായി ആചരിക്കാന്‍ തീരുമാനിച്ചത്‌. ഹംഗറിയുടെ ഭക്ഷ്യ മന്ത്രിയായിരുന്ന ഡോ. പാല്‍ റോമാനിയാണ്‌ കോണ്‍ഫറന്‍സില്‍ ഈ ആശയം ലോകത്തിനു മുമ്പില്‍ അവതരിപ്പിച്ചത്‌. വമ്പിച്ച്‌ പിന്തുണയോടെ യുഎന്‍ അത്‌ അംഗീകരിച്ചു. ലോകത്താകമാനം 150 രാജ്യങ്ങളിലെങ്കിലും ഒക്‌ടോബര്‍ 16 ഭക്ഷ്യദിനമായി ആചരിക്കുന്നു.
1981 മുതല്‍ ഓരോ വര്‍ഷവും ഭക്ഷ്യദിനം ആചരിക്കുമ്പോള്‍ ഒരു ആശയം അതോടൊപ്പം പ്രചരിപ്പിക്കാനും യുഎന്‍ തീരുമാനിച്ചു. ഇ ത്‌ ഒരു സന്ദേശമായി സമൂഹത്തിന്‌ പകര്‍ന്നു നല്‍കുക എന്നതായിരുന്നു ലക്ഷ്യം. ഈ വര്‍ഷം ഭക്ഷ്യദിനാചരണത്തിന്റെ സന്ദേശം ഭ ക്ഷ്യ സുരക്ഷയാണ്‌(ളീീറ ലെരൗൃശ്യേ). ഓരോ രാജ്യങ്ങളിലും വളരെ വിപുലമായ രീതിയിലാണ്‌ ഈ ദിനത്തില്‍ പരിപാടികള്‍ നടക്കുന്നത്‌. യൂറോപ്‌, ഏഷ്യ, ആഫ്രിക്ക, ലാറ്റിനമേരിക്ക മുതലായ ഭൂഖണ്‌ഡങ്ങളിലെ രാജ്യങ്ങളാണ്‌ ഈ ദിനം പ്രാധാന്യത്തോടെ ആചരിക്കുന്നത്‌.

ഭക്ഷ്യ ഉച്ചകോടി

ഈ വര്‍ഷം നവംബ ര്‍ 16 മുതല്‍ 18 വരെ റോമില്‍ ലോക ഭക്ഷ്യ ഉച്ച കോടി നടക്കുകയാണ്‌. അന്താരാഷ്‌ട്ര തലത്തില്‍ വളരുന്ന ദാരി ദ്ര്യവും പട്ടിണി യും പ്രതിരോധിക്കുക, എല്ലാവര്‍ക്കും ഭക്ഷണം ഉറപ്പുവരുത്തുക, കൃഷിയെ പ്രോത്‌സാഹിപ്പിക്കുക എന്നീ ല ക്ഷ്യങ്ങ ളോടെയാണ്‌ റോമില്‍ ഭക്ഷ്യ ഉച്ച കോടി നടക്കുന്നത്‌. വികസ്വര രാഷ്‌ട്രങ്ങളില്‍ ഉണ്ടായിട്ടുള്ള ഭക്ഷണ സാധനങ്ങളുടെ അനിയന്ത്രിതമായ വിലക്കയറ്റമാണ്‌ പട്ടിണിക്കാരുടെ എണ്ണം ഭീമമായി ഉയരാനിടയാക്കിയതെന്ന്‌ കരുതപ്പെടുന്നു. ഓരോ വര്‍ഷവും ഇത്‌ കൂടിവരികയാണ്‌. ആഗോള സാമ്പത്തികപ്രതിസന്ധി ഇതി നൊരു സുപ്രധാന കാരണമായി വിലയി രുത്ത പ്പെടുന്നു.
എഫ്‌എഒയുടെ ഇപ്പോഴത്തെ ഡയറക്‌ട ര്‍ജനറല്‍ ജാക്വിസ്‌ ഡിയോഫാണ്‌ 2009 ലെ ഭക്ഷ്യദിനാചരണത്തിന്റെ ലക്ഷ്യം ഭക്ഷ്യ സുരക്ഷ ആവണം എന്ന്‌ നിര്‍കര്‍ഷിച്ചത്‌. അദ്ദേഹത്തിന്റെ വാക്കുകള്‍ ശ്രദ്ധിക്കുക- ``ലോകത്തില്‍ ആറു പേരിലൊരാള്‍ പട്ടിണിക്കാ രനാണ്‌. ഇത്‌ ലോക സമാധാനത്തിനും സുരക്ഷയ്‌ക്കും ഒരുവെല്ലുവിളിയാണ്‌. ആതിനാല്‍ പട്ടിണി നിര്‍മാര്‍ജനം ചെയ്യാന്‍ എല്ലാവരും ഒന്നിച്ച്‌ മുന്നിട്ടിറങ്ങണം.''

ഭക്ഷ്യ പ്രതിസന്ധി ഇന്ത്യയില്‍

ഇന്ത്യയില്‍ ഭക്ഷ്യ പ്രതിസന്ധി രൂക്ഷമാകാനുള്ള ഒരു പ്രധാന കാരണം വിലക്കയറ്റമാണ്‌. രാജ്യത്തുണ്ടായ പണപ്പെരുപ്പവും പട്ടിണിക്ക്‌ കാരണമായെന്നാണ്‌ വിദഗ്‌ധരുടെ അഭിപ്രായം. അനിയന്ത്രിതമായ ജനസംഖ്യാവര്‍ധനവും ഒരു പ്രധാന കാരണമായി ചൂണ്ടി ക്കാണിക്കപ്പെടുന്നു.
ശരാശരി നാല്‌ ഇന്ത്യക്കാരിലൊരാള്‍ ഒരു ദിവസം തള്ളി നീക്കുന്നത്‌ 30ല്‍ താഴെ രൂപ ചെലവഴിച്ചാണെന്ന്‌ കണക്കുകള്‍ സൂചിപ്പിക്കുന്നു. നമ്മുടെ രാജ്യത്ത്‌ മാത്രമല്ല അന്താരാഷ്‌ട്രതലത്തിലും നിരവധി ജനങ്ങള്‍ നിത്യവൃത്തി കഴിക്കുന്നത്‌ ചുരുങ്ങിയ വരുമാനം കൊണ്ടാണ്‌.
ഇന്ത്യ ദരിദ്രരുടെയും പട്ടിണി പ്പാവങ്ങളു ടെയും കണക്കില്‍ മുമ്പന്തിയില്‍ തന്നെയുണ്ട്‌. രാജ്യ പുരോഗതി നഗരകേന്ദ്രീകൃതമായി പോകുന്നതാണ്‌ ഒരു പ്രധാന കാരണം. കാര്‍ഷിക മേഖലയിലുണ്ടായിക്കൊണ്ടിരിക്കുന്ന തളര്‍ച്ചയും വര്‍ദ്ധിച്ചുവരുന്ന തൊഴിലില്ലായ്‌മയുമാണ്‌ ദാരിദ്ര്യത്തിന്റെ പ്രധാന കാരണം. ഇവ പരിഹരിക്കാനുള്ള നടപടികളാകട്ടെ വേണ്ടവിധത്തില്‍ ഫലം കാണുന്നുമില്ല. സമ്പന്നന്‍ വീണ്ടും സമ്പന്നനാകുന്നു. ദരിദ്രന്‍ വീണ്ടും ദരി ദ്രനായിക്കൊണ്ടിരിക്കുന്നു.

പട്ടിണി നിവാരണ ദിനം

ലോകത്തുനിന്ന്‌ പട്ടിണിയെ അപ്രത്യക്ഷമാക്കുക എന്ന ലക്ഷ്യത്തോടെയാണ്‌ ഐക്യരാഷ്ട്രസംഘടനയുടെ ജനറല്‍ അസംബ്ലി 1993 മുതല്‍ ഒക്ടോബര്‍ 17 പട്ടിണി നിവാരണ ദിനമായി ആചരിച്ചു വരിച്ചുവരുന്നത്‌. വികസ്വര, അവികസിത രാഷ്ട്രങ്ങളെയാണ്‌ പട്ടിണി ഏറ്റവുമധികം ബാധിച്ചിരിക്കുന്നത്‌. അതിനാല്‍ത്തന്നെ ദരിദ്രരെ സഹായിക്കുക എന്നതാണ്‌ ഈ ദിനാചരണത്തിലൂടെ യുഎന്‍ ലക്ഷ്യമിടുന്നത്‌. 2015ഓടെ ആഗോളതലത്തിലുള്ള പട്ടിണിയുടെ തോത്‌ പകുതിയായി ക്കുറയ്‌ക്കുകയാണ്‌ ഐക്യരാഷ്ട്ര സംഘടനയുടെ ലക്ഷ്യം. ഈ വര്‍ഷം പട്ടിണി നിവാരണ ദിനത്തിന്റെ സന്ദേശ മായി യുഎന്‍ മുന്നോട്ടുവയ്‌ക്കുന്ന ആശയം `പട്ടിണിയെ ഇല്ലായ്‌മ ചെയ്യാന്‍ ഒത്തൊരുമിച്ച്‌' എന്നതാണ്‌.

കുട്ടികളില്‍ പട്ടിണി കിടക്കുന്നവരുടെ എണ്ണം ക്രമാതീതമായി വര്‍ദ്ധിച്ചുകൊണ്ടിരിക്കുകയാണെന്നാണ്‌ ഐക്യരാഷ്‌ട്ര സഭയുടെ പുതിയ വെളിപ്പെടുത്തല്‍. സേവ്‌ ദ ചില്‍ഡ്രണ്‍ എന്ന അമേരിക്കന്‍ സംഘടന ലോകത്താകമാനം പട്ടിണികിടക്കുന്ന കുഞ്ഞുങ്ങള്‍ക്ക്‌ ഭക്ഷമെത്തിക്കാനാണ്‌ ശ്രമിക്കുന്നത്‌. ഇത്‌ എത്രത്തോളം ഫലം കാണുമെന്നറിയില്ലെങ്കിലും അഭിമാനകരമായ ഒരു ആശയമാണ്‌ അവര്‍ മുന്നോട്ടുവയ്‌ക്കുന്നത്‌. സംഘടനയുടെ സിഇഒ ആയ ചാള്‍സ്‌ മക്കോര്‍മാക്‌ പറയുന്നത്‌ ശ്രദ്ധിക്കുക, മുന്‍വര്‍ഷങ്ങളെക്കാളധികമായി ഈ വര്‍ഷം ലോകത്താകമാനം ദിനംപ്രതി പട്ടിണി കിടക്കുന്നവരുടെ എണ്ണം ഈ വര്‍ഷം ക്രമാതീതമായി വര്‍ദ്ധിച്ചിരിക്കുന്നു. കുട്ടികളാണ്‌ ഇവരില്‍ നല്ലൊരു പങ്കും. അവര്‍ക്ക്‌ ഒരു നേരമെങ്കിലും ഭക്ഷണമെത്തിക്കാനാണ്‌ ഈ പരിപാടിയിലൂടെ ഞങ്ങള്‍ ശ്രമിക്കുന്നത്‌.

മുന്‍ വര്‍ഷങ്ങളിലെ ഭക്ഷ്യദിനത്തിലെ ആശയങ്ങള്‍

2008 ഭക്ഷ്യ സുരക്ഷ- കാലാവസ്ഥ വ്യതിയാനങ്ങള്‍ക്കിടയില്‍
2007 ഭക്ഷണത്തിനുള്ള അവകാശം
2006 ഭക്ഷ്യസുരക്ഷയ്‌ക്കായി കൃഷിക്ക്‌ പ്രധാന്യം നല്‍കുക
2005 കൃഷിയും സംസ്‌കാര കൈമാറ്റവും
2004 ഭക്ഷ്യസുരക്ഷയ്‌ക്കായി ജൈവവൈവിധ്യം
2003 അന്താരാഷ്‌ട്ര തലത്തില്‍ പട്ടിണിക്കെതിരേ പോരാടുക
2002 ഭക്ഷ്യ സുരക്ഷയ്‌ക്കുള്ള സ്രോതസ്‌- ജലം
2001 ദാരിദ്ര്യ നിര്‍മാര്‍ജനത്തിനായി പട്ടിണിക്കെതിരേ പോരാടുക
2000 പട്ടിണിയില്‍ നിന്നും മുക്തമായ ഒരു സഹസ്രാബ്‌ദം
1999 പട്ടിണിക്കെതിരേ യുവാക്കള്‍
1998 സ്‌ത്രീകള്‍ പട്ടിണി മാറ്റുന്നു
1997 ഭക്ഷ്യസുരക്ഷയ്‌ക്കായി നിക്ഷേപിക്കുക
1996 പട്ടിണി, പോഷകാഹാരക്കുറവ്‌ എന്നിവയ്‌ക്കതിരേ പോരാടുക
1995 എല്ലാവര്‍ക്കും ഭക്ഷണം
1994 ജീവന്‍ നിലനിര്‍ത്താന്‍ വെള്ളം
1993 പ്രകൃതി വൈവിധ്യം ഉപയോഗപ്പെടുത്തുക

1992 ഭക്ഷണവും പോഷകവും

1991 ജീവന്‍ നിലനിര്‍ത്താന്‍ മരങ്ങള്‍
1990 ഭാവിക്കായി ഭക്ഷണം
1989 ഭക്ഷണവും പരിസ്ഥിതിയും
1988 ഗ്രാമീണ യുവത്വം സംരക്ഷിക്കുക
1987 ചെറുകിട കര്‍ഷകരെ സംരക്ഷിക്കുക
1986 മത്സ്യത്തൊഴിലാളികളും അവരുടെ സമൂഹവും
1985 ഗ്രാമീണ ദാരിദ്ര്യ നിര്‍മാര്‍ജനം
1984 സ്‌ത്രീകളും കൃഷിയും
1983 ഭക്ഷ്യസുരക്ഷ
1982 ഭക്ഷണം എല്ലാറ്റിലും പ്രധാനം
1981 ഭക്ഷണം എല്ലാറ്റിലും പ്രധാനം

ഒരു വയനാടന്‍ ശ്രവ്യാനുഭവം

``നിങ്കാ നിനെക്കിന്റെരിയോ... നമിന്റെ നാടുനെമു കാടുനെമു പൂവെനെമു ഒക്ക. ആ ചന്തയൊക്ക നിങ്കണ്ട മനച്ചിലി തെളിഞ്ചു ബന്റോന്നോ. കാണിയല്ല...എവ്‌ടെയാന്റു ആ ചന്തകീന്റ കാഴ്‌ചെ...?''
(നിങ്ങള്‍ ഓര്‍ക്കുന്നുവോ നമ്മുടെ നാടും കാടും പുഴയുമെല്ലാം... ആ മനോഹരമായ കാഴ്‌ച മനസില്‍ തെളിയുന്നുണ്ടോ...? ഇല്ല.. അല്ലേ! എവിടെയാണ്‌ ആ മനോഹരമായ കാഴ്‌ച...?)

ഏതാനും മാസം മുമ്പുവരെ വയനാട്ടിലെ ആദിവാസികള്‍ക്കു മാത്രം സുപരിചിതമായിരുന്ന ഭാഷാപ്രയോഗങ്ങള്‍ ഇപ്പോള്‍ ജില്ലയിലെ റേഡിയോ ശ്രോതാക്കള്‍ക്കു പരിചിതമായിക്കഴിഞ്ഞു. അടുത്തയിടെ വയനാട്ടില്‍ പ്രക്ഷേപണം ആരംഭിച്ച `റേഡിയോ മാറ്റൊലി'യാണ്‌ ഇതിനു കാരണം. കേരളത്തിലെ റേഡിയോ പ്രക്ഷേപണ രംഗത്ത്‌ ഒരു പുതിയ ചുവടുവയ്‌പ്‌. സംസ്ഥാനത്തെ ആദ്യത്തെ കമ്യൂണിറ്റി റേഡിയോ സ്റ്റേഷന്‍.


ആദിവാസികള്‍ അവതരിപ്പിക്കുന്ന `തുടിച്ചെത്തം' എന്ന പരിപാടിയിലെ ഒരു ഭാഗമാണ്‌ മുകളില്‍ വായിച്ചത്‌. ഇതുള്‍പ്പെടെ പൊതുജനത്തിന്‌ ആസ്വാദ്യവും ഉപകാരപ്രദവുമായ നിരവധി പരിപാടികള്‍ അവതരിപ്പിച്ചുകൊണ്ടാണ്‌ `റേഡിയോ മാറ്റൊലി' വയനാട്‌ ജില്ലയുടെ ശബ്ദമായി മാറിയിരിക്കുന്നത്‌. ഇതു വയനാടു ജില്ലയിലെ ഏക സ്വകാര്യ എഫ്‌ എം സ്റ്റേഷനാണ്‌.


അടിസ്ഥാന സൗകര്യവികസനത്തില്‍ ഏറെ പിന്നില്‍ നില്‍ക്കുന്ന വയനാടിനെ സംബന്ധിച്ചിടത്തോളം അഭിമാനിക്കാന്‍ വക നല്‍കുന്നതാണ്‌ ഈ റേഡിയോ സ്റ്റേഷന്‍. ഇന്ത്യയില്‍ 145-ാമത്തേതെങ്കിലും കേരളത്തില്‍ ആദ്യത്തേതായ കമ്യൂണിറ്റി റേഡിയോ സ്റ്റേഷന്‍ എന്നതു മാത്രമല്ല അഭിമാനകരമായ സംഗതി. വിനോദ പരിപാടികള്‍ ഇല്ലാതിരുന്നിട്ടും പോപ്പുലറായിത്തീര്‍ന്നിരിക്കുന്ന കമ്യൂണിറ്റി റേഡിയോ എന്നതാണു കൂടുതല്‍ പ്രധാനം.

2006 ഡിസംബറില്‍ കേന്ദ്ര വാര്‍ത്താവിനിമയ മന്ത്രാലയം കമ്യൂണിറ്റി റേഡിയോ സ്റ്റേഷനുകള്‍ സ്ഥാപിക്കുന്നതിനുള്ള മാര്‍ഗരേഖയ്‌ക്കു രൂപം കൊടുത്തു. അതേത്തുടര്‍ന്ന്‌ റേഡിയോ സ്റ്റേഷന്‍ തുടങ്ങാന്‍ ആദ്യം അപേക്ഷ കൊടുത്തതു വയനാട്‌ സോഷ്യല്‍ സര്‍വീസ്‌ സൊസൈറ്റിയാണ്‌. മാനന്തവാടി രൂപതയുടെ കീഴില്‍ പ്രവര്‍ത്തിക്കുന്ന സംഘടനയാണ്‌ വയനാട്‌ സോഷ്യല്‍ സര്‍വീസ്‌ സൊസൈറ്റി (ഡബ്ല്യു.എസ്‌.എസ്‌.എസ്‌). മാനന്തവാടി രൂപതാധ്യക്ഷനായ മാര്‍ ജോസ്‌ പൊരുന്നേടത്തിന്റെ പ്രത്യേക താത്‌പര്യപ്രകാരമാണ്‌ ഈ റേഡിയോ സ്റ്റേഷന്‍ അനുവദിച്ചുകിട്ടുന്നതിനായി സൊസൈറ്റി അപേക്ഷ കൊടുത്തത്‌. 34 വര്‍ഷം സാമൂഹിക പ്രവര്‍ത്തനരംഗത്തു പരിചയമുള്ള സൊസൈറ്റിക്ക്‌ അനുമതിയും കിട്ടി. കഴിഞ്ഞ ജൂണ്‍ ഒന്നിന്‌ സ്റ്റേഷനില്‍ നിന്ന്‌ പരീക്ഷണ പ്രക്ഷേപണം ആരംഭിച്ചു. ഔദ്യോഗികമായ ഉദ്‌ഘാടനം ജൂലൈ 25 നായിരുന്നു.

മാനന്തവാടിക്കടുത്ത പ്രദേശമായ ദ്വാരകയിലാണു സ്റ്റേഷന്‍ സ്ഥിതി ചെയ്യുന്നത്‌. 2009 ജൂലൈ 25ന്‌ വയനാട്‌ പാര്‍ലമെന്റ്‌ അംഗം എം. ഐ. ഷാനവാസാണ്‌ സ്റ്റേഷന്‍ ഉദ്‌ഘാടനം ചെയ്‌തത്‌. 90.4 ഫ്രീക്വന്‍സിയില്‍ സ്റ്റേഷന്‍ ശ്രോതാക്കള്‍ക്ക്‌ ലഭ്യമാക്കിയിരിക്കുന്നു.


തുടക്കത്തില്‍ പ്രസ്‌താവിച്ച `തുടിച്ചെത്തം' ആദിവാസികള്‍ക്കുവേണ്ടിയുള്ള പ്രത്യേക പരിപാടിയാണ്‌. ദിവസേന ഇരുപതു മിനിറ്റ്‌ നീളുന്ന ഈ പരിപാടി അവതരിപ്പിക്കുന്നത്‌ ആദിവാസികള്‍ തന്നെ. വയനാട്ടിലെ ആദിവാസികളില്‍ എണ്ണത്തില്‍ കൂടുതലുള്ള പണിയര്‍, കാട്ടുനായ്‌ക്കര്‍, റാവുളര്‍ (അടിയര്‍) എന്നിവര്‍ അവരവരുടെ തനതു ഭാഷയിലും ശൈലിയിലുമാണ്‌ ഇതില്‍ പരിപാടികള്‍ അവതരിപ്പിക്കുന്നത്‌. കുറുമരുടെ ഭാഷയിലും പരിപാടികള്‍ അവതരിപ്പിക്കാനുള്ള ശ്രമത്തിലാണ്‌ ഇപ്പോള്‍ സ്റ്റേഷന്‍ അധികൃതര്‍.
ട്രൈബല്‍ പരിപാടികള്‍ക്കു മേല്‍നോട്ടം വഹിക്കാന്‍ ഒരു പ്രത്യേക പാനല്‍ ഇവിടെ ഉണ്ട്‌. റാവുള വിഭാഗത്തില്‍പ്പെട്ട അജയ്‌ പനമരം എന്ന കലാകാരനാണ്‌ അതിന്റെ കോ-ഓര്‍ഡിനേറ്റര്‍.


ആദിവാസികളുടെ ഭാഷയിലുള്ള പരിപാടികള്‍ക്കു ശ്രോതാക്കള്‍ ഏറെയാകാന്‍ മറ്റൊരു കാരണം കൂടിയുണ്ട്‌. ആദിവാസികള്‍ തങ്ങള്‍ അറിഞ്ഞിരിക്കേണ്ട പല കാര്യങ്ങളും നിരക്ഷരത കാരണം അറിയാതെ പോകുന്നുണ്ടായിരുന്നു. എന്നാല്‍ ഈ റേഡിയോ സ്റ്റേഷന്റെ വരവോടു കൂടി എല്ലാ കാര്യങ്ങളിലും ആദിവാസികള്‍ക്ക്‌ വിവരങ്ങള്‍ പകര്‍ന്നു നല്‍കാന്‍ `മാറ്റൊലി' പ്രത്യേകം ശ്രദ്ധിക്കുന്നുണ്ട്‌. പത്രവാര്‍ത്തകളും മറ്റ്‌ അറിയിപ്പുകളും അതത്‌ ആദിവാസി ഭാഷകളിലേക്ക്‌ തര്‍ജമ ചെയ്‌താണു പ്രക്ഷേപണം നടത്തുന്നത്‌.


വയനാടന്‍ മണ്ണിന്റെ ഗന്ധവും പാരമ്പര്യവുമുള്ള ആദിവാസികള്‍ക്ക്‌ തങ്ങളുടെ തനിമ കാത്തുസൂക്ഷിക്കാനും അതു ലോകത്തിനു മുമ്പില്‍ അവതരിപ്പിക്കാനുമുള്ള അവസരമാണ്‌ ഇതുവഴി തുറന്നുകിട്ടിയിരിക്കുന്നത്‌. സ്വകാര്യ എഫ്‌ എം സ്റ്റേഷനുകള്‍ മലയാളത്തില്‍ ഇറക്കുമതിചെയ്‌ത റേഡിയോ ജോക്കി സംസ്‌കാരവുമായി ഇവരുടെ അവതരണശൈലിക്ക്‌ യാതൊരുവിധ ബന്ധവുമില്ല. ഓരോ ആദിവാസി വിഭാഗത്തിനും അതതിന്റെ സംസാര ശൈലിയും പെരുമാറ്റ രീതിയുമുണ്ട്‌. അവയെ ആയിരിക്കുന്ന അവസ്ഥയില്‍ ജനങ്ങളുടെ മുമ്പിലെത്തിക്കുന്നിടത്താണ്‌ റേഡിയോ മാറ്റൊലിയുടെ വിജയം. പ്രക്ഷേപണത്തില്‍ ഈ റേഡിയോ പുലര്‍ത്തുന്ന വ്യത്യസ്‌തത ആദിവാസിവിഭാഗങ്ങളുടെ ഇടയില്‍ ഇതിനു വലിയ പ്രചാരമാണ്‌ ഉണ്ടാക്കിയിരിക്കുന്നത്‌.


മുഖ്യധാരയി ല്‍നിന്നു പിന്തള്ളപ്പെട്ട ആദിവാസികള്‍ക്കു തങ്ങളുടെ ശബ്ദം സമൂഹത്തില്‍ മാറ്റൊലിക്കൊള്ളിക്കാന്‍ `തുടിച്ചെത്തം' എന്ന പരിപാടി വഴി സാധിക്കുന്നു. ഇതു കൂടാതെ സ്റ്റേഷന്‍ അവതരിപ്പിക്കുന്ന മറ്റു പരിപാടികള്‍ക്കും ശ്രോതാക്കള്‍ കൂടിവരികയാണെന്ന്‌ അടുത്തയിടെ നടത്തിയ ഒരു സര്‍വേ കണ്ടെത്തി.


ഒരു കൊമേര്‍സ്യല്‍ എഫ്‌എം സ്റ്റേഷന്റെ യാതൊരുവിധ രൂപഭാവങ്ങളുമില്ലാതെയാണ്‌ റേഡിയോ മാറ്റൊലി പ്രക്ഷേപണം നടത്തുന്നത്‌. വയനാടന്‍ ജനതയുടെ ശ്രദ്ധയില്‍പ്പെടു ത്തേണ്ട വിഷയങ്ങള്‍ `അറിയിപ്പുകള്‍' എന്ന പരിപാടിയില്‍ ഇവര്‍ പ്രധാന്യ ത്തോടെ അവതരി പ്പിക്കുന്നുണ്ട്‌. വയനാടു ജില്ല യിലെ ജനങ്ങളെ ഉദ്ദേശിച്ചാണ്‌ ഈ പരിപാടി രൂപക ല്‌പന ചെയ്‌തി രിക്കുന്നത്‌. വൈദ്യുതി മുടക്കം, ഗതാഗത തടസം മുതലായ അറിയിപ്പുകള്‍ അതതു സമയം ജനങ്ങളില്‍ എത്തിക്കുന്നു. `ചുറ്റുവട്ടം' എന്ന പരിപാടിയില്‍ വയനാട്ടിലെ അതതു ദിവസത്തെ സംഭവവികാ സങ്ങള്‍ അവതരിപ്പിക്കുന്നു. ഉത്‌സവങ്ങള്‍, പെരുന്നാളുകള്‍ മുതലായ പ്രധാന പരിപാടികള്‍ ഇങ്ങനെ പൊതുജനശ്രദ്ധയില്‍പ്പെടുത്തുന്നുണ്ട്‌. കാര്‍ഷിക മേഖലയിലെ സ്‌പന്ദനങ്ങള്‍ കോര്‍ത്തിണക്കി അവതരിപ്പിക്കുന്ന `ഞാറ്റുവേല'യാണ്‌ മറ്റൊരു ജനപ്രിയ പരിപാടി.


വിവിധ മേഖലകളില്‍ പ്രാഗല്‌ഭ്യം തെളിയിച്ചവരെ പരിചയപ്പെടുത്തുന്ന `പ്രതിഭകളെ അറിയൂ', സ്‌ത്രീകള്‍ക്കായുള്ള `വനിതാ മാറ്റൊലി', കുട്ടികള്‍ക്കായുള്ള `മയില്‍പ്പീലി', ഗൃഹവൈദ്യ- നാട്ടുവൈദ്യ വിവരങ്ങള്‍ പകര്‍ന്നു നല്‍കുന്ന `നാട്ടറിവ്‌' മുതലായ പരിപാടികള്‍ ജനപ്രീതി പിടിച്ചുപറ്റിയവയാണ്‌. `ജനവാണി'യാണ്‌ മറ്റൊരു പ്രധാന പരിപാടി. വ്യക്തികളും സമൂഹങ്ങളും നേരിടുന്ന വിവിധങ്ങളായ പ്രശ്‌നങ്ങള്‍ അധികാരികളെ അറിയിക്കാനും അവയ്‌ക്കു പരിഹാരം തേടാനുമുള്ള ഒരു വേദിയായി മാറിയിരിക്കുകയാണ്‌ ജനവാണി. അടുത്തയിടെ റബര്‍ കര്‍ഷകരുടെ ഒരു പ്രശ്‌നം ഈ പരിപാടിയിലുടെ പ്രക്ഷേപണം ചെയ്‌തിരുന്നു. ഇത്‌ ശ്രദ്ധയില്‍പ്പെട്ടതിനെത്തുടര്‍ന്ന്‌ റബര്‍ ബോര്‍ഡ്‌ വേഗത്തില്‍ പ്രശ്‌നം പരിഹരിച്ചു. സമാനമായ മറ്റൊരു പരിപാടിയാണു `ഘടികാരം'. ഏതെങ്കിലും പ്രശ്‌നം വിശദമായി പഠിച്ച്‌ ജനങ്ങളുടെ അഭിപ്രായങ്ങള്‍ കോര്‍ത്തിണക്കി അവതരിപ്പിക്കുന്ന ഈ പരിപാടിക്ക്‌ ശ്രോതാക്കള്‍ ഏറെയാണ്‌.


കലയ്‌ക്കും സാഹിത്യത്തിനുമായി പ്രത്യേക പരിപാടികളാണ്‌ മാറ്റൊലിയില്‍ ഉള്ളത്‌. `അരങ്ങ്‌' എന്ന പരിപാടിയില്‍ വിവിധ കലാരൂപങ്ങള്‍ അവതരിപ്പിക്കപ്പെടുന്നു. ഒരു കാലത്ത്‌ റേഡിയോ പ്രേക്ഷകര്‍ കാത്തിരുന്നു കേട്ട റേഡിയോ നാടകങ്ങളും ലളിതഗാനം, കഥാപ്രസംഗം മുതലായ വയും `അരങ്ങി'ല്‍ അവതരിപ്പിക്കപ്പെടുന്നു. തൊഴിലന്വേഷകര്‍ക്കായി തയാറാക്കി അവതരിപ്പിക്കുന്ന പ്രത്യേക പരിപാടിയാണ്‌ `കരിയര്‍ മാറ്റൊലി.'


പതിനഞ്ചു കിലോമീറ്ററാണ്‌ വായുവില്‍ സ്റ്റേഷ ന്റെ ദൂരപരിധി. മിക്കവാറും വയനാടു ജില്ലയിലെ എല്ലാ പ്രദേശങ്ങളിലുമുള്ള ജനങ്ങള്‍ക്ക്‌ പരിപാ ടികള്‍ ലഭ്യമാകുന്നുണ്ട്‌. ജില്ലയോടു ചേര്‍ന്നു കിടക്കുന്ന തമിഴ്‌നാടുഭാഗമായ നീലഗിരി, കണ്ണൂര്‍ ജില്ലയിലെ ആറളം തുടങ്ങിയ പ്രദേശങ്ങളിലും സ്റ്റേഷന്‍ ലഭ്യമാകുന്നുണ്ട്‌.


ബിഷപ്‌ മാര്‍ പൊരുന്നേടമാണ്‌ സ്റ്റേഷന്റെ ചെയര്‍മാന്‍. സ്റ്റേഷന്‍ ഡയറക്‌ടറായി പ്രവര്‍ത്തിക്കുന്നത്‌ മാനന്തവാടി രൂപതയിലെ മീഡിയ കമ്മീഷന്റെ ചെയര്‍മാനായ ഡോ. ഫാ. തോമസ്‌ തേരകമാണ്‌. അസിസ്റ്റന്റ്‌ ഡയറക്‌ടര്‍ ഫാ. ജെയ്‌സ്‌ ബേബി ചെട്ട്യാശേരി, ജേര്‍ണലിസത്തില്‍ ബിരുദാനന്തര ബിരുദധാരിയാണ്‌. ഇവരെക്കൂടാതെ 124 പേര്‍ പല സമയ ങ്ങളില്‍ ഇവിടെ ജോലി ചെയ്യുന്നുണ്ട്‌. ഇവരില്‍ ഡെപ്യൂട്ടി തഹസില്‍ദാര്‍, റിട്ടയേര്‍ഡ്‌ അധ്യാപകര്‍, വിദ്യാര്‍ഥികള്‍, സിസ്റ്റേഴ്‌സ്‌, വൈദീകര്‍ എന്നിവരുമുണ്ട്‌. എട്ടുപേര്‍ മാത്രമാണ്‌ ശമ്പള വ്യവസ്ഥയില്‍ ജോലി ചെയ്യുന്നവര്‍. ടെക്‌നീഷ്യ ന്മാരാണ്‌ ഇവര്‍. മറ്റുള്ളവര്‍ സാമൂഹിക സേവനമായാണ്‌ ഇവിടത്തെ ജോലിയെ കാണുന്നത്‌. ഇവര്‍ക്ക്‌ ആകെ ലഭി ക്കുന്നത്‌ ഉച്ചഭക്ഷണം മാത്രം. പ്രതിഫലേച്ഛ കൂടാതെ ധാരാളം പേര്‍ ജോലി ചെയ്യുന്നുവെന്നതാണ്‌്‌ കമ്യൂണിറ്റി സ്റ്റേഷന്‍ എന്ന നിലയില്‍ `റേഡിയോ മറ്റൊലി' യുടെ വിജയ രഹസ്യം.


സാങ്കേതിക വിദഗ്‌ധര്‍ക്കു ശമ്പളത്തിനുള്ള തുക കണ്ടെത്തുന്നത്‌ പരസ്യത്തിലൂടെയാണ്‌. മണിക്കൂറില്‍ അഞ്ചു മിനിറ്റ്‌ മാത്രമാണു പരസ്യത്തിനായി നീക്കിവച്ചിരിക്കുന്നത്‌. എന്നാല്‍ സ്‌പോണ്‍സേര്‍ഡ്‌ പ്രോഗ്രാമുകള്‍ക്ക്‌ അനുവാദമില്ല. സൗണ്ട്‌ റിക്കോര്‍ഡിംഗിന്‌ ഒഴിവുസമയങ്ങളില്‍ സ്റ്റുഡിയോ വാടകയ്‌ക്കു നല്‍കി കിട്ടുന്ന വരുമാനമാണ്‌ പരസ്യത്തിനു പുറമേയുള്ള ഏക സാമ്പത്തിക സ്രോതസ്‌.
താമസിയാതെ പ്രക്ഷേപണ സമയം ദീര്‍ഘിപ്പിക്കാനും പദ്ധതിയുണ്ട്‌. പരിപാടികളുടെ എണ്ണവും വര്‍ധിപ്പിക്കും.


മറ്റു സ്വകാര്യ എഫ്‌എം സ്റ്റേഷനുകളെപ്പോലെ വാര്‍ത്താ വതരണത്തിനുള്ള അനുമതി ഈ സ്റ്റേഷനും ഇല്ല.
മാനന്തവാടി രൂപതയുടെ കീഴിലാണു സ്റ്റേഷന്‍ പ്രവര്‍ത്തി ക്കുന്നതെങ്കിലും ഇതിലെ പരിപാടികള്‍ തികച്ചും മതേതരമാണ്‌. എല്ലാ മതവിഭാഗത്തില്‍പ്പെട്ടവരുടെ പരിപാടികളും ഇതില്‍ പ്രക്ഷേപണം ചെയ്യുന്നുണ്ട്‌. `കര്‍ക്കടകം' എന്ന പരിപാടി രാമായണ മാസത്തില്‍ പ്രക്ഷേപണം ചെയ്‌ത പരിപാടിയാണ്‌. `റംസാന്‍ മാറ്റൊലി' യായിരുന്നു മറ്റൊരു പ്രധാന പരിപാടി. ഓരോ മതത്തെയും കുറിച്ച്‌ മറ്റുളളവര്‍ക്ക്‌ അറിവു പകര്‍ന്നു കൊടുക്കുക എന്ന ഉദ്ദേശ്യത്തോടെയാണ്‌ ഇത്തരം പരിപാടികള്‍ അവതരിപ്പിക്കുന്നത്‌.


വിദ്യാഭ്യാസം, പുരോഗതി, മതസൗഹാര്‍ദം എന്നീ ലക്ഷ്യങ്ങള്‍ മുന്‍നിര്‍ത്തിയാണ്‌ സ്റ്റേഷന്‍ പ്രവര്‍ത്തിക്കുന്നത്‌. വിനോദ പരിപാടികള്‍ക്ക്‌ അമിതപ്രാധാന്യം നല്‍കിയിട്ടില്ല. ഒരു അടിപൊളി റേഡിയോ സ്റ്റേഷന്‍ എന്ന കാഴ്‌ചപ്പാടിലല്ല മാറ്റൊലിയുടെ പ്രവര്‍ത്തനം. സമൂഹ നന്മയ്‌ക്കുതകുന്ന കാര്യങ്ങള്‍ രസകരമായ രീതിയില്‍ അവതരിപ്പിക്കാറുണ്ട്‌. വല്ലപ്പോഴും ഒരു ചലച്ചിത്രഗാനവും ഉള്‍പ്പെടുത്തും.


തുടക്കത്തില്‍ ദിവസം നാലു മണിക്കൂറാണ്‌ പ്രക്ഷേപണം ഉണ്ടായിരുന്നത്‌. രാവിലെ ആറുമുതല്‍ എട്ടു വരെയും വൈകിട്ട്‌ ആറുമുതല്‍ എട്ടുവരെയമായിരുന്നു അത്‌. ഇപ്പോള്‍ രണ്ടൂ മണിക്കൂര്‍കൂടി പ്രക്ഷേപണസമയം വര്‍ധിപ്പിച്ച്‌ ആറുമണിക്കൂര്‍ ആക്കിയിട്ടുണ്ട്‌. ഉച്ചതിരിഞ്ഞ്‌ ഒന്നുമുതല്‍ മൂന്നുവരെയാണ്‌ ഇപ്പോള്‍ കൂട്ടിച്ചേര്‍ത്തിരിക്കുന്ന സമയം.


വളരെ വിപുലമായ സംവിധാനമാണ്‌ റേഡിയോ സ്റ്റേഷനില്‍ ഉള്ളത്‌. ട്രാന്‍സ്‌മിറ്റര്‍, ഓണ്‍ എയര്‍ സ്റ്റുഡിയോ, അത്യാധുനിക റിക്കോര്‍ഡിംഗ്‌ റൂം എന്നിവയ്‌ക്കു പുറമേ ലൈവ്‌ റിപ്പോര്‍ട്ടിംഗിനു സഹായിക്കുന്ന ഔട്ട്‌ഡോര്‍ ബ്രോഡ്‌കാസ്റ്റിംഗ്‌ യുണിറ്റും ഉണ്ട്‌.


വയനാടിന്റെ സാംസ്‌കാരിക തനിമ ഉയര്‍ത്തിപ്പിടിക്കുന്ന പരിപാടികള്‍ അവതരിപ്പിച്ച്‌ റേഡിയോ മാറ്റൊലി വയനാടന്‍ സംസ്‌കാരത്തിന്റെ ഭാഗമായിക്കഴിഞ്ഞു. ``റേഡിയോ മാറ്റൊലി, മാറ്റത്തിന്റെ ശംഖൊലി'' എന്നത്‌ ഇപ്പോള്‍ വയനാട്‌ ജില്ലയിലെ റേഡിയോ ശ്രോതാക്കളുടെ ഇടയില്‍ പ്രചരിച്ചുവരുന്ന വാക്യമായി രിക്കുന്നു.


ഈ ജനപ്രീതി തുടരുമെന്നുതന്നെ കരുതണം. കാരണം ഇത്‌ ഒരു സംസ്‌കാരത്തിന്‌ കൈവന്നിരിക്കുന്ന ശബ്ദമാണ്‌.